1. Прозорци – што се треба да знаете?

Правилниот избор на прозорци е многу важен. Ви препорачуваме пред да се заменат или пред да купите нови, убаво да се распрашате за разните видови прозорци, нивните карактеристики и за цените. Обрнете внимание на тоа дали понудувачот обезбедува вградување, одржување и гаранција. Имајте на ум дека прозорците преставуваат долгорочна инвестиција и дека треба да потраат 10 до 30 години.

1.1. Термоизолација

Квалитетните прозорци може да го намалат губитокот на топлина и до 30%. Дебелината и топлинската спроводливост на рамот плус топлинската спроводливост на стаклата – ја прават вкупната непропустливост на прозорецот, односно, го определуваат изолационите квалитети на прозорецот. На енергетската ефикасност најмногу влијае доброто дихтување на прозорецот – најдобри се тие со трикоморни стакла. Со вградување на квалитетни прозорци можете да ги намалите трошоците за греење за повеќе од 1/3!

1.2. Звучна изолација

Доколку вашата куќа или стан се наоѓа во урбана средина, во близина на поголеми патишта или железничка пруга, добрата звучна изолација на прозорците е од огромно значење. Количникот на звучна изолација се означува со Rw.

1.3. Одржување

На долготрајноста на прозорците секако дека влијае и нивното редовно одржување. Во зависност од тоа од каков материјал се направени, се разликува како начинот така и фреквенцијата за чистење. Наједноставни за одржување се ПВЦ прозорците (повремено бришење со мокра крпа), слично и алуминиумските. Околу дрвените прозорци има повеќе работа, особено тие што се намачкани со масло, затоа што треба да се премачкуваат секоја година. Дрвените прозорци кои се лакирани или фарбани исто така треба да се освежуваат на неколку години, во зависност од тоа колку се изложени на атмосферски влијанија.

1.4. Хармоничен изглед

Не треба да се занемари на кој начин прозорците се вклопуваат во естетскиот впечаток, без разлика дали станува збор за зграда или куќа. За среќа, во денешно време постојат безброј бои, форми и материјали со што лесно се решава складноста со околината.

1.5. Издржливост

Квалитетни прозорци кои правилно се одржуваат може да траат и повеќе од 30 години. При купување, обрнете внимание на гаранцијата која не смее да биде помалку од 10 години.

1.6. Безбедност и заштита од кражби

Со квалитетен оков на прозорците истите ниту може насилно да се отворат, ниту пак да се подигнат.

2. Понудувач на прозорци – избор

Купувањето на прозорци не е занемарлива инвестиција, поради што ви препорачуваме најпрво детално да се распрашате за понудувачите и да соберете повеќе озбилни понуди.

2.1. Гаранција 

Долгиот гарантен рок е показател за квалитетот на прозорците. Произведувач или понудувач кој е сигурен во својот квалитет, секогаш дава повеќегодишна гаранција. Се додека трае гаранцијата, со правилна употреба и одржување, прозорците мора да бидат во одлична состојба.

2.2. Монтажа и одржување

Еден од најважните фактори за оптимална трајност на прозорците е правилна и професионална монтажа. Во спротивно, многу бргу ќе се појават т.н. топлински мостови кои ќе го поништат сиот бенефит од купување на квалитетни прозорци. Поради тоа, ви предлагаме, да изберете понудувач кој има сопствени мајстори за монтажа и одржување.

2.3. Документација

Откако ќе се заврши со монтажата, продавачот на прозорци треба да ви даде и документација – потврда за квалитет, енергетска ефикасност, гаранција за работната рака, како и техничка спецификација.

3. Прозорци – според материјалот

Естетиката и ефикасноста на купените прозорци зависи, покрај останатото и од материјалот од кој се направени. Постојат безброј комбинации на материјали, како и бои и нијанси, но и форми на прозорци кои овозможуваат прозорците да се вклопат ама баш во секој амбиент.

3.1. Дрвени прозорци

За дрвените прозорци, можеби и повеќе отколку за останатите, квалитетната изработка и квалитетот на материјалот (дрвото мора да биде правилно и навреме исечено, сушено на точно одреден начин итн..) се од пресудно значење. Во спротивно, прозорците нема да ја исполнуваат својата цел на задоволувачки начин. Ви препорачуваме да изберете квалитетни прозорци од лепена дрвена граѓа, заштитени со специјални заштитни средства кои ги штитат, но не го нарушуваат природниот изглед ниту пак својствата на материјалот. Покрај тоа што создаваат многу пријатен амбиент и влијаат на удобноста на престојот, дрвените прозорци се одличен топлински и звучен изолатор. Доколку редовно и правилно се одржуваат, а од тој аспект се потешки од останатите материјали, може да потраат со децении. Доколку прозорците не се од квалитетна граѓа, со тек на годините под влијание на временските прилики и неприлики, многу бргу ќе се исушат, ќе испукаат, ќе се деформираат и ќе почнат да пропуштаат воздух. Секако, секогаш постои опасност од влага, мувла, габички и шумски вошки (инсекти кои се хранат со дрво), но и останати штетни влијанија. Дрвените прозорци преставуваат слаба противпожарна заштита, а најпосле, што воопшто не е за занемарување, поскапи се дури за 30% на пример, од алуминиумските прозорци.

3.2. ПВЦ прозорци

Понудата на прозорци од вештачки материјали на пазарот е доста голема, а и цената им е доста прифатлива. При тоа, ПВЦ прозорците обезбедуваат солидна топлинска и звучна изолација, како и цврстина и стабилност во споредба со тие од други материјали. Отпорни се на надворешни влијанија, лесно се одржуваат и долг им е векот на употреба. Сосема спротивно од дрвените прозорци, тешко се запалуваат и слабо горат, со што преставуваат подобра противпожарна заштита. Како што на пазарот може да се најдат безброј акрилни бои и дезени кои се имитација на дрво, многу лесно ќе најдете таква каква што ви треба. Од еколошка гледна страна, ПВЦ прозорците се делумно прифатливи, бидејќи некои делови може да се рециклираат, а некои се не разградливи и не обновливи. ПВЦ прозорците реагираат на температурни колебања, при што во лето од топлото може да се олабават, а во зима потешко се отвораат и затвараат, доколку не се подобро заштитени. Точно е и тоа дека УВ зрачењето има влијание на трајноста на ПВЦ прозорците.

3.3. Комбинирани прозорци од дрво и алуминиум

Ваквите прозорци се одлична комбинација на природни материјали и издржливост. Убавината на природното дрво, која во секој простор внесува удобност и топлина, здружена со заштитна алуминиумска облога, ги овозможува предностите на двата материјали. Прозорците од дрво и алуминиум се карактеризираат со одлична УВ заштита, непропустливост, минимално одржување (повремено треба да се прелакира или префарба внатрешната, дрвената страна) и долготрајност. Надворешните алуминиумски маски може да ги најдете во сите бои и нијанси на РАЛ палетата, односно, имитација на дрво. Единствена слабост на ваквите прозорци е нивната цена која е и до 60% повисока од ПВЦ прозорците.

3.4. Алуминиумски прозорци

Од сите материјали за прозорци, алуминиумот е најцврст и нај долготраен, поради што е и најценет. Од друга страна, иако најскапи, алуминиумските прозорци вредат за секој потрошен денар бидејќи со години остануваат непроменети. Многу се стабилни, овозможуваат одлична заштита а лесно се употребуваат и одржуваат. Првенствено се употребуваат за застаклување на големи површини. При завршната обработка, лесно може да се фарбаат во било која боја со што сосема ќе се вклопат во вашиот амбиент. Единствена слаба страна им е високата цена (во споредба со ПВЦ прозорците инвестицијата е двојно поголема) и донекаде слаба термоизолација.

4. Начини на монтажа

4.1. Што всушност значи квалитетна монтажа?

Професионалната монтажа на прозорците ја гарантира нивната трајност и енергетска ефикасност. Од тој аспект, најважен е ,,контактот“ ѕид и прозорец, од причина што овој спој мора сосема да биде затнат. Рамот на прозорецот, исто така не смее никаде да се оштети, а ниту пак прозорските крила. Кога се отвораат и затвараат прозорските крила тие не смее никаде да запнуваат ниту пак да имаат ,,празен од“.

4.2. На кој начин се одвива монтажата?

1)     Прозорците се доставуваат во одреден ден.

2)     Мајсторите треба да ви објаснат како ќе се одвива работата.

3)     Се поставува заштита за ѕидовите, подот и останатите изложени површини.

4)     Се вадат постоечки прозорци.

5)     Се поставуваат рамките и се нивелираат во ѕидниот отвор. Со помош на ласерско метро се одредува аголот, висината и длабочината за монтирање на прозорецот.

6)     Прозорците се поставуваат во отворот кој се пополнува со одредени средства во зависност од избраниот вид на монтажа (класична, еколошка или РАЛ).

7)     На крај доаѓа преглед и проверка на сработеното.

8)     Мајсторите ќе ви остават упатство за правилна употреба и одржување и соодветни сертификати и гаранција.

4.3.  Видови на монтажа

4.3.1. Класична монтажа

Најчест начин на монтажа на прозорци. Спојката помеѓу ѕидот и прозорецот се полни со пур-пена.

4.3.2.   Еко-монтажа

Спојот помеѓу ѕидот и прозорецот се полни со еколошка, еластична пена која постојано ,,работи“ – се растегнува и се собира, согласно атмосферските услови, со што овозможува одлична енергетска ефикасност. Ваквиот вид на монтажа се препорачува при адаптација на стари објекти.

4.3.3. РАЛ монтажа

При монтажа на прозорци на ниско енергетски и пасивни куќи, РАЛ монтажата е задолжителна, но се препорачува и за секоја новоградба бидејќи овозможува најдобра термоизолација, практично без можност за губење на топлина. Од внатрешната страна прозорците се затнуваат со паропропустлива маса, а од надворешната страна со еластичен полиуретанска (ниско експандирачка) пена, со што се овозможува водената пареа да излегува од просторијата, но не може да влегува. РАЛ монтажата спречува и продирање на вода во ѕидовите, а со самото тоа спречува и кондензација.